भिटामिन B3 ले फ्याटी लिभर रोगलाई नियन्त्रण गर्ने सम्भावना : नयाँ अनुसन्धानको उपलब्धि
विश्व जनसंख्याको करिब ३० प्रतिशतलाई प्रभावित गर्ने मेटाबोलिक–एसोसिएटेड फ्याटी लिभर डिजिज (MASLD) हालसम्म प्रभावकारी लक्षित उपचारविहीन रोगका रूपमा परिचित थियो। तर, हालै गरिएको एक क्रान्तिकारी अनुसन्धानले यस रोगसँग सम्बन्धित प्रमुख आनुवंशिक कारण पत्ता लगाएको छ, र अझ चमत्कारिक कुरा त यो हो कि यसलाई नियन्त्रण गर्न सबैभन्दा प्रभावकारी औषधि भिटामिन B3 (नायसिन) भएको प्रमाणित भएको छ।
अनुसन्धानकर्ताहरूको खोज
दक्षिण कोरियाको युएनआइएसटी (UNIST) का प्रोफेसर जाङ ह्युन छोईको नेतृत्वमा, पुसान नेशनल युनिभर्सिटी (PNU) का प्रोफेसर ह्वायोङ युन र उल्सान युनिभर्सिटी अस्पताल (UUH) का प्रोफेसर न्युंग ह्वा पार्कको सहकार्यमा बनेको टोलीले पहिलो पटक विश्वस्तरमा MASLD को विकास र प्रगतिको क्रममा माइक्रोआरएनए–९३ (miR-93) को भूमिका स्पष्ट पारेका छन्।
miR-93 को प्रभाव
miR-93 लिभरका हेपाटोसाइट्स मा हुने विशेष RNA हो जसले केही लक्ष्य जीनहरूको अभिव्यक्तिलाई दवाउँछ। अनुसन्धानमा फ्याटी लिभर भएका बिरामी र जनावर दुवैमा miR-93 असामान्य रूपमा बढेको पाइएको छ।
यसले SIRT1 नामक जीनलाई रोक्दै लिभरको बोसो metabolism मा अवरोध गर्छ, जसका कारण लिभरमा बोसो जम्ने, सुजन बढ्ने र फाइब्रोसिस हुने अवस्था देखा पर्छ।
जनावरमा गरिएको परीक्षण
miR-93 लाई हटाइएका मुसामा लिभरमा बोसो जम्ने समस्या उल्लेख्य रूपमा घट्यो, साथै इन्सुलिन संवेदनशीलता र लिभर कार्यसम्बन्धी सूचकमा पनि सुधार आयो। उल्टै, miR-93 बढाइएका मुसामा लिभरको चयापचय अवस्था झन् बिग्रिएको देखियो।
भिटामिन B3 को चमत्कारिक प्रभाव
१५० वटा FDA–स्वीकृत औषधिहरूमध्ये, नायसिन (भिटामिन B3) ले miR-93 लाई सबैभन्दा प्रभावकारी रूपमा दबाउने देखियो। नायसिन सेवन गरिएका मुसामा miR-93 स्तर उल्लेख्य रूपमा घट्यो र SIRT1 सक्रिय भयो। यसले लिभरको बिग्रिएको बोसो चयापचयलाई पुनः सामान्य अवस्थामा ल्यायो।
अनुसन्धान टोलीका अनुसार,
“यस अध्ययनले MASLD को आणविक कारणलाई ठ्याक्कै स्पष्ट पारेको छ, साथै पहिले नै प्रयोगमा रहेको सुरक्षित भिटामिनलाई पुनःउपयोग गरेर उपचारमा नयाँ सम्भावना देखाएको छ।”
उपचारमा सम्भावना
नायसिन पहिले नै हाइपरलिपिडेमिया (रगतमा बोसो बढ्ने अवस्था) उपचारका लागि प्रयोग हुने सुरक्षित औषधि भएकाले, यो भविष्यमा MASLD का लागि संयुक्त उपचार (combination therapy) मा प्रयोग गर्न सकिने ठूलो सम्भावना देखिएको छ।
प्रकाशन र योगदान
यो अनुसन्धानलाई कोरिया नेशनल रिसर्च फाउन्डेशन (NRF) र कोरिया रिसर्च इन्स्टिच्युट अफ बायोसाइन्स एण्ड बायोटेक्नोलोजी (KRIBB) को सहयोग प्राप्त भएको थियो। अनुसन्धान नतिजा अन्तर्राष्ट्रिय ख्यातिप्राप्त जर्नल Metabolism: Clinical and Experimental मा प्रकाशित भएको छ।
अनुसन्धानमा UNIST का डा. यो हान ली र कियुन पार्क, उल्सान युनिभर्सिटी अस्पताल का प्रोफेसर जुनहो जुङ, र पुसान नेशनल युनिभर्सिटी की जिनयङ ली सह–प्रथम लेखकका रूपमा सहभागी भएका थिए।
References:
- Yo Han Lee, Jinyoung Lee, Joonho Jeong, Kieun Park, Bukyung Baik, Yuseong Kwon, Kimyeong Kim, Keon Woo Khim, Haneul Ji, Ji Young Lee, Kwangho Kim, Ji Won Kim, Tam Dao, Misung Kim, Tae Young Lee, Yong Ryoul Yang, Haejin Yoon, Dongryeol Ryu, Seonghwan Hwang, Haeseung Lee, Dougu Nam, Won Kon Kim, Neung Hwa Park, Hwayoung Yun, Jang Hyun Choi. Hepatic miR-93 promotes the pathogenesis of metabolic dysfunction-associated steatotic liver disease by suppressing SIRT1. Metabolism, 2025; 169: 156266 DOI: 10.1016/j.metabol.2025.156266
